මේ ලිපිය ඇරඹීමට පෙර ඔබ සැමට ලැබුවා වූ නව වසර සාමය සතුට පිරි සෞභාග්‍යමත් වසරක් වේවා..!යි (පුරුද්දට නොව) හදවතින්ම ප්‍රාර්ථනා කරමි.වර්තමාන අවුරුද්ද පිළිබඳ විපරීත අදහස් කීපයක් මනසට නැඟීම නිසා එය සටහනකට නැඟීමට සිතුවෙමි.කවර නම් වලින් හැඳින්වූවද සිංහල ( සමහරුන්ට සිංහල හා දෙමළ)අළුත් අවුරුද්ද ශ්‍රි ලංකාවේ වැදගත්ම සංස්කෘතික උත්සවය බව අවිවාදිතය.එහෙත් අද අවුරුද්ද යනු හුදෙක් මාධ්‍ය සංදර්ශනයක් වී ඇත.අවුරුද්දේ සැබෑ උරුම කරුවන් වන සාමාන්‍ය ජනතාවට එය අවිඤ්ඤානික චාරිත්‍ර ලැයිස්තුවකි, ඇඟලුම් පිළිබඳව මැසිවිලි වලින් එකිනෙකාට සුභ පතා ගන්නා සමයකි.
වසර තිහක යුද්ධකට පසුව ලැබූ "නිදහසේ" අවුරුද්ද ලෙස මෙය හඳුන්වනු ලැබූවද සතුටු විය හැකි වෙනසක් මෙම අවුරුද්දේදී දක්නට නොවීය. මැතිවරණ සමයක් බැවින් අවුරුදු නැකැත් ලිත් ඇති තරම් නොමිලේම ලැබිණි.එහෙත් මාගේ දැඩි අවධානයට ලක් වූ අංශයක් වන්නේ අවුරුදු සමයේ වෙළඳ ප්‍රචාරණයයි.මෙවර ඔවුහු ප්‍රධාන වශයෙන්ම් අවුරුද්ද "සාමය"ට බලහත්කාරයෙන්ම ගැට ගසා ගෙන තිබුණි.අවුරුදු 30 කට පස්සේ සිංහල දෙමල කාටත් එකට අවුරුදු කෑ හැකි බව ඔවුහු මතක් කළහ.මෙහිදී මට ඇති වූ ගැටළුවනම් අවුරුදු 30 කට පෙර මොවුන් එකට අවුරුදු කෑවෙහිද යන්නයි.(මට තාම වයස 30 සම්පූර්ණ වී නැත).
නත්තලට රක්ත වර්ණ හිම තොප්පි දමාගෙන විකුනණ පැකේජයම බක් මහට රෙද්ද සහ හැට්ටය ඇඳගෙන විකුනණ විට අපි මහත් අභිරුචියෙන් වැළඳ ගන්නෙමු.අවුරුදු "කෑමට" පමණක් අවුරුද්ද යොදා ගැනීම අපගේ පරම අමනෝඤ්ඤකමය.වෙනස් සංස්කෘතීන් දෙකක් මුහු කර කොටළු සංස්කෘතියක් බිහි කිරීම මෙම වෙළඳ සමාගම් වල අභිමතාර්ථය වේ.පසුව කොටළු සංස්කෘතියක් නිසරු යැයි බටහිර පන්ඩිතයින් විසින් අර්ථ දක්වා අවසානයේදී බටහිර සංස්කෘතියම අප කර මත පැටවීම මඟින් සුවච කීකරු වටිනා පාරිභෝගිකයින් පිරිසක් නිර්මාණය කරගැනීම ඔවුනගේ මතු සුභසිද්ධිය සඳහාමය.
අවුරුදු කාලයේ අපේ හැසිරීම මොහොතකට බලමු.නැකැත් වේලාව නිවැරදිව කියන්නේ රූපවාහිනියයි.අපි කළ ගුණ දත්තෝ වෙමු.ඉතින් මුළුමනින්ම දින දෙකක් අනිමිසලෝචනයෙන් රූපවාහිනිය පුදමු.එහි අවුරුදු විකාශය නිමා වූ පසු අපේ අවුරුද්දත් ඉවරය.අවසානයේ අප්‍රේල් මාසයේ අවුරුදු දීමනාවෙන් ඉතිරි වූ මුදල සහ තවත් ලඟ ඇති මුදල සූරා බැංකුවක හිර කර පහනක් හෝ ඔරලෝසුවක් ගෙදර ගෙන යන්නෙමු.අපේ අවුරුද්ද මෙයයි.
මේ වසරේ අවුරුදු නැකැත් අවසානය.එහෙත් අප අපේ සුපුරුදු ජීවන රටාව ඇරඹිය යුතුය.ලබන වසරේ සිටවත් විචාරශීලීව අවුරුද්ද පිළිගැනීමට අවස්ථාවක් ලැබේවායි පතමි.
